بطال يستنى مسكين.....

ياولدى فيق
اشغلتنى عليك
والنهار راهو تعدى
وانت صارلك هكة مدة
لا تخرج لا حد ايجيك
ياخى اشبيك؟
جاوبنى انكلم فيك...."
"اخطانى رانى فاد
وكرهت هالبلاد
ومعادش انحب انشوف العباد"
"من هالكلام يزيك
انت فى خير عليك
شهادة بين ايديك
والصحة تبارك الله عليك"
"قتلى شهادة علمية؟
واش عملتلى هاذية
خسارة ماكسرت المخ
كل يوم ننسخ منها نسخ
وندور بين الادارات
وواقف على البيرووات
وتجينى الاستدعاوات
ونشارك فى المناظرات
وكل كونكور انشارك فيه
نعرف مانيش ناجح فيه
اما انقول اشكون يعرف
بالكشي هالمرة تخطف
وفى الاخر تقعدلى احلام
ومجرد اوهام
الى نبات عليه
من غدوة نصبح فيه
تتفكر فرحة التخرج
والوعود بالعمل
وكيفاش بديت نلوج
وكلى ثقة وامل
وكل يوم نتمرج
ومالقيت حتى حل
حتى لين فديت
فديت..
يا امى فديت
فديت من هالحالة
الفلس والبطالة
غيرك يخدم وانت لالا
وانت هاك بربي تشوف
كل يوم نطلب فى المصروف
وساعات حتى نتسلف
باش انجم نتكيف
وبالرغم الى مش مؤيس
وهانى قاعد انفركس
ونجرى زى الناس
ونحضر للكاباس
وساعات انقول هذا رزق
وربي متكفل بيه
وهو وحدو يقسم فيه
وساعات يدخلى الوسواس
ونقول ثماش كتف
والا رشوة تخطف
لا دور ولا شدان صف"
"ياولدى الى تقول فيه
كل يوم انا نسمع فيه
واشنوة الى تراه الحل"
"اشبيك ياامى
اش عندى مانعمل
نستنى كيما الناس الكل
ودعيواتك العديدة
هاهم ما مشولى شئ
برا صب version جديدة
بالكش قدمو شوي